انعکاس جایزه ادبی مین بیر اؤیکودرنشریه چاپ کانادا

"مین بیر اؤیکو" یاریشی­نین بیرینجی دؤورونده اوستونلوک قازانمیش اوچ حیکایه آشاغیداکی کیمی سونولور:

1 ـ ایلک باخیشدا، روایت باخیمیندان کئچمیش ناغیل­لارا بنزه­دییینه رغمن، چاغداش بیر اؤیکونون اؤزللیک­لرینی داشیدیغینا گؤره، "مین بیر گئجه" ناغیل­لارینی خاطیرلایاراق بیر بیرینه توخونموش روایت پازل­لرینی باجاریقلا سؤیله­دییینه گؤره، آذربایجان فولکلوروندان آلدیغی بعضی گؤرونتولری سئحیرلی رئالیزم کیمی اؤیکوده گتیردییینه گؤره، آجی بیر ساتیرایا قاپیلیب اوخوجونو اینجیتمه­دن قوتیک دورومدان قروتئسک دوروما گئدیب چاتماسینا گؤره، اووسونلانمیش کاراکترلرین اؤیکو اوزره آلین­یازیسینی گوجلو سویه­ده گؤستردییینه گؤره، او بیری حیکایه­لره نیسبت تعلیق تکنیکیندن اوغورلو یارارلاندیغینا گؤره، بیر ده دیل قورولوشونون ساغلاملیغینا گؤره، حامد احمدی­نین "توتماتورا" آدلی اؤیکوسو بیرینجی یئری قازانیر. ها بئله، هبوط آدلی ابدی ازلی روایتدن خلاق بیر سؤیله­ییشی اورتایا قویدوغونا گؤره، مدرن دوروما قاپیلاراق آخرالزمان سؤیله­می اوزره دایاندیغینا گؤره، اؤیکو دیلی تام اؤیکو قوللوغوندا اولدوغونا گؤره، حامد احمدی­نین "منی قالدیرین لوطفن" اؤیکوسو ایسه "توتماتورا"یا تای بیرینجی یئری قازانمیش کیمی ساییلیر.  

2ـ روایتینده نئچه سسلی­لیک دویولدوغونا گؤره، اؤیکونون ایکینجی بؤلومونده یئنی­یئتمه بیر قیزین آی­باشی اولماغینی سؤیله­یرک قادینجا بیر روایت دیلینه ال تاپدیغینا گؤره، یازی­نین بینامتنی ماهییتینه گؤره، روایت­لرین آیریلیغینی اوغورلا باش باغلاماغینا گؤره، بیر پارا چاتیشمامازلیق­لاردان گؤز یوماراق اوست­اوسته اؤیکو دیلی­نین ساغلاملیغینا گؤره، اؤیکونون ماراقلاندیران طرحینه گؤره عبدالمجید چاوشی­زاده­نین "پیشیک­باسان" آدلی اؤیکوسو ایکینجی یئری قازانیر.

3ـ اؤیکونون ماراقلی طرحینه گؤره، اؤیکوده­کی ایناندیریجی گئرچک دوروم­لارا گؤره، ناغیل فورماسینا قاپیلمادان آذربایجان فولکلوروندان اؤیکونون قوللوغوندا یارارلاندیغینا گؤره، شعارا وارمادان بیر پارا سؤزلری آجی ساتیرا کیمی سؤیله­دییینه گؤره، دیلی­نین نیسبتن آخارلی اولدوغونا گؤره مرتضا سلمانی­نین "آیاق ایزلری" آدلی اؤیکوسو اوچونجو یئری قازانیر. (اؤیکولریwww.1001gece.blogfa.com  وئبلاقیندا اوخویا بیلرسینیز.)   

بوندان علاوه، رضا فریدی­نین "کؤک و قیزساققیزی، بیر ده، آنا و توچا ماجرالاری" آدلی اؤیکوسو اؤزل سورئال دوروم­لارینا گؤره، علی عباسی­نین "اوچ ساعات آزادلیق" آدلی اؤیکوسو ائتکیلَندیرن طرحینه گؤره، رسول ملک­زاده­نین "یئددی..." آدلی اؤیکوسو آخارلی دیلینه گؤره، عادل قلی­پورون "مینیش" آدلی اؤیکوسو ساده بیر طرحی چاغداش بیر اؤیکو کیمی سؤیله­دییینه گؤره، آیدین آرازین "ساعات آلتیدا دایانمیشدی" آدلی اؤیکوسو ماراقلاندیران دوروم­لارینا گؤره، شریف مردی­نین " بو منم، اؤز قوجاغیمدا!" آدلی اؤیکوسو دیل قورولوشونون ساغلاملیغینا گؤره، علی­اصغر اوجاقلونون یئنی بیر باخیمدان اؤیکو سؤیله­مه­یه چالیشدیغینا گؤره تقدیره لاییق گؤرونورلر.

بئله­لیک­له، بو ادبی یاریشا قاتیلمیش بوتون یازیچی­لارا درین سایغی­لاریمیزی بسله­یرک، فئستیوالین خرج­لرینی اؤده­مکده اؤز دَیرلی مادی یاردیم­لارینی اسیرگه­مه­ین سایین علی نوری­ و آدلارینی سؤیله­مه­یه اذن وئرمه­ین باشقا دوست­لارا دا اؤز میننت­دارلیغیمیزی بیلیندیریرک. 

مین بیر اؤیکو فئستیوالی

اینترنت اوزره کئچیریله­جک "مین بیر اؤیکو" آدلی ادبی یاریشدا، هر بیر سیاسی باخیشدان اوزاق گزه­رک، یالنیز و یالنیز ادبیاتا دوشونمک مقصدینده­ییک. بو یولو، بوش ال ایله باشلاساق دا، سیزین دولغون یازی­لارینیزا گووَ­نمیشیک. 

"مین بیر اؤیکو" فئستیوالیندا، اؤیکولرین سئچیمینده هانسی سؤزون دئمه­سی نظرده آلینماییب، سؤزون نئجه دئمه­یی اوستون توتولاجاق­دیر. دیل عمومییتده و اؤیکو دیلی (زبان داستانی) اؤزللیکده، هر هانسی یازیچی­نین اثرینی اوخوماقدا اساس فاکت­لاردان بیری ساییلاجاق­دیر. دیل عمومییتده یعنی: اؤیکونون آذربایجان تورکجه­سینده یازیلماسی. دیلیمیزین قورولوشونا اویغون اولان یارادیلیجیق­لار، ان چوخ نؤمره­لری قازاناجاق­لار. بوردا، "یارادیلیجیق" سؤزونو دئدیییمیزده، چاغداش بیر اؤیکونون قایدالاری اساسیندا یازیلمیش اثرلردن دانیشماقداییق. الیمیزه چاتاجاق اثرلر ایچره­سینده، یالنیز، قرامئر باخیمیندان دوزگون­جه­ یازیلمیش یازی­لارا ده­یر وئریلمه­یه­جک­دیر؛ اونلارین چاغداش بیر اؤیکونون اؤزللیک­لرینی داشیدیق­لاری دا، کسکین­له نظرده آلیناجاق­دیر. 

اؤیکو دیلی دئدیییمیزده ایسه اؤیکونون قوللوغوندا اولان دیل مقصددیر. بوردا ادبی دیل دئییل، سؤیلم (روایت)ـین گره­ک­لرینی نظرده آلاراق، حتتا یوزه یوز ادبی دیل ایله ده اوست اوسته دوشمه­ین یازیچی­نین قونداردیغی دیلدن دانیشیریق. اؤیکو دیلی، سؤیلمین دوغما آلینماسیندا بیرینجی رولدا اویناییر.

ژوری هئیت: محمود مهدوی، آتیلا اسکندانی، رضا کاظمی

***

ـ "مین بیر اؤیکو" ادبی یاریشی، یالنیز، اؤیکو ساحه­سینده کئچیریله­جک­دیر.

ـ یازیچی هر بیر یاشدا اولورسا اولسون، بو ادبی یاریشا قاتیلماق اوچون سن محدودیتی قویولماییب­دیر.

ـ هر یازیچی ان چوخو ایکی اؤیکو گؤندَره بیلر.

ـ گؤنده­ریله­جک اؤیکولرین بیر یئرده چاپ اولوب اولماماسی اؤنملی دئییل.

ـ یازی­لارین Word  فایلیندا، Tahoma فونتوندا گؤنده­ریلمه­سی اؤنه­ریلیر.

ـ یازیچی­یا عایید اؤزل بیلگی­لر، او جومله­دن آد، سوی آدی، دوغوم ایلی، ایلگی قورماق اوچون تلفون (یوخسا موبایل) نؤمره­سی گره­کلی­دیر. یازیچی­نین قیسا ادبی بیوقرافی­سی بونلارا آرتیلیرسا، داها آرتیق یئرینه دوشر.

ـ اؤیکولر، آذر آیی­نین 10 ـجو گونونه قدَر MinBirOyku@gmail.com آدرسینه گؤندَریلمه­لی­دیر. (بو مؤهلت، هئچ بیر شراییطده تمدید اولونمایاجاق­دیر.)

ـ سونوج­لار (نتیجه­لر)، بو ایلین قوربان بایرامیندا، آذر آیی­نین 19 ـجو گونونده Www.Oykuler.blogfa.com بللی اولوناجاق­دیر.

ـ فئستیوالا گؤندَریله­جک اؤیکولرین ایچیندن، ژوری هئیتین نظری ایله اوچ اوستون اؤیکو سئچیله­جک­دیر.

ـ بیرینجی یئری قازانمیش اؤیکونون یازارینا 120000 تومن، ایکینجی­سینه 100000 تومن، اوچونجوسونه ایسه 80000 تومن اؤدول وئریله­جک­دیر. بونلاردان علاوه، سئچیلمیش یازیچی­لارا بورونج تقدیر لؤوحو، بیر ده بیر پارا هنری اثرلر هدیه اولوناجاق­دیر. ­

ژنرال

آتیلا اسکندانی 

ایل­لردیر اوشاق­لاردان نیفرت ائدیر. ایل­لردیر کؤرپه­لرین باخیش­لارینا غضب­له­نیر. ایل­لردیر تلویزیونون اوشاق رئکلام­لاری غملندیریر اونو. نئیله­سین بو قوجا؟ نئیله­سین آلتمیش یاشلی خسته ژنرال. سرطان بوتون بدنینی بورویوب. دیواردان آسلانمیش بالاجا قیزین شکیلی­نین گؤتورولمه­سینی ایسته­ییر. او ایسه بوندان لال اولماسینی! نئیله­سین بو قوجا ژنرال اوشاق­لار دونیاسیندا.

بوگون حالی داها یاوالاشیر. نئچه قوشون باشچیسی، وزیر، وکیل گؤروشونه گلیب. اسقف گلیب؛ الینده بؤیوک بیر قیزیل خاچ. خاچ اولماسا اسقف یئره ییخیلار دئیه دوشونور.

مکتب اوشاق­لاری دا گلیرلر. ساری، یاشیل، الوان رنگ­لر اوتاقدا فیرلانیر باشینا. بیر بالاجا اوغلان شئعر اوخویور، سونرا اؤیرتمن قادین ـ «ژنرال بیزیم قهرمانیمیزدیر! چکدییینیز شکیل­لری گؤسترین» دئییر.

ژنرال بیر – بیر شکیل­لره باخیر. تانگین اوستونده، دیش­لری گؤرونورکن گولور. اؤنونده اؤلولر، بایراق ­دا اسیر. او اوچاق­لار اوستونده، ائله بیل آتا مینیب قووالاییر دوشمنی، گولور. بومبا سپه­له­ییر قاچان آدام­لارین باشینا، گونش­ ده داغ­لارین آرخاسیندا گولور.

بیردن درد باشلاییر. یاتاغی­نین اؤرپه­یینی جیرماقلاییر. دیش­لرینی سیخیر.

آمما گولسون گرَک. تلویزیون اونون سون ساعت­لارینی جانلی اولاراق، یاییر. آنجاق او میللتین قهرمانی­دیر. بوتون ساواش­لارین قودوز دیده­رگین ژنرالی.

□□□

اؤزونو ساخلایانمیر. بیر بالاجا قیز اوشاغینا گؤزلرینی بَره­لدیر. قیشقیریر. اوجادان دا قیشقیریر. اور­کدن قیشقیریر. اوشاق­لار دا قیشقیریب قاچیرلار. نئیله­سین بو قوجا اؤلومجول قهرمان؟ بو اوشاق­لارین باخیش­لاری، ایل­لر اؤنجه بیر کندین خاطیره­لرینی یادینا سالیر. «قانلی خوجالی»نین اوشاق­لارینی.

  ترَن

آتیلا اسکندانی

ترن یولا دوشور. واغزالدا اؤپوشمه­لر چوخالیر. بعضن ده، اؤپوش­لر یئله تاپیشیریلیر. اوشاق­لار قیرمیزی، ساری، ماوی قوووق­لارینی اوچوردورلار، سربازلارین ساغلیغینا. مارش سسی هیجان یارادیر واغزالدا. سربازلار گولور، قادین­لار ال­لرینی قالدیریرلار اونلارا. ترن یولا دوشور.

ترن ـ ترن ـ  ترن ـ ترن...

□□□

ترن قاییدیر. واغزالدا قارا بایراق اسیر. عزا مارشی اوجالیر، قادین­لار آغلاییر، اوشاق­لار یوخ، واقون­لار بیر هن بیر یوخ. ترن قوتور توتوب.

ترن ـ تر ـ رن ـ ن...

بونلار ...

آتیلا اسکندانی

                                                سعید موغانلیا

لب­تابینی آچیر. دیجیتال دونیاسیندان سئودیک­لرینی منه گؤستریر. بونلار شاعیر، بونلار اؤیکو­یازان، بونلار دوستاقدا. بونلار دا آغاج­لار فایلی، بونلار مئشه، بونلار امامیه قبریستانلیغی­نین قبیر داش­لاری. بو لب­تابدا، بو قدَر قهرمانین نئجه توپلانماسینا دوشونورم؟

 او اؤز ایشینده. من سیقار چکیرم، چای ایچیرم. فوتوقراف­لار دالبادل بئینیمه دولور. ایشیق­لار. فوتوقرافین معناسینی اوندان سوروشموشدوم. ایشیقنان یازماق دئمیشدی. اونون یولداش­لاری اونا ایشیقدیلار. منه دئییر: بونلار بیزیم یولوموزا ایشیق سالیرلار!

ایشیغیمی یازسین دئیه قولاغینا پیچیلداییرام؛ منه باخ! منی سئو! ساچ­لاریمی، یاناق­لاریمی، گؤزلریمی پاریلدات! خیاباندا، من هر گون گؤزلریمی اینانیرام، آمما سن ...

*

لب­تابی باغلاییر. تله­سیک گؤز یاش­لارینی سیلیر. منی اؤپور. ال­لریمی الینه آلیب دئییر: گؤزلیم! فوتوقراف­لاریمی سنین آدینا سئیو ائله­دیم، من ده یوخ اولسام، دوست­لارا گؤستر اونلاری...

*

...  لب­تابی آچیرام.  بونلار آغاج­لار، بونلار مئشه، بونلار اؤیکوچولر، بونلار دوستاقدا ...